మధుసూదన ద్విశతకం
#117
ఓర్పు నేర్పులలో మనకన్నా మిన్న
వారు లేనిదే మనమన్నది సున్న
స్వాగతిద్ధాము వారిని సాధికారతనిచ్చి
మనసు పెట్టి వినరా మధుసూదనా!
#116
ఎదురు చూస్తున్నావంటు వెంటనే రాదు
తప్పించుక తిరగ చూడ తరలి పోదు
నూకలు చెల్లంగనే నిన్నెత్తుకెళ్ళు చావు
మనసు పెట్టి వినరా మధుసూదనా!
#115
తాళియంటే తాడు కాదు తెంపి పారవేయ
విప్పడానికి కాదు వేసింది మూడు ముడులు
విడిపోవు మనస్పర్థలు విచక్షణతో చర్చించిన
మనసు పెట్టి వినరా మధుసూదనా!
#114
చేయకూడని పనిని చేయమాకెప్పుడూ
చూచులే అంతరాత్మ చూడకున్ననెవరూ
అపరాధమన్నది అగ్గిలా దహించును
మనసు పెట్టి వినరా మధుసూదనా!
#113
విలువ లేదని సున్నాను వెలకట్టకుందుమా
పక్కనుండి సంఖ్య విలువ పదింతలు చేయునే
ఉన్నతి కోరే వ్యక్తుల వేలెన్నడూ విడువకు
మనసుపెట్టి వినరా మధుసూదనా!
#112
సరదా పరిచయాలు సాగిస్తే అలవాటుగా
అదుపు తప్పిపోయి ఆపదలు తెచ్చిపెట్టు
బానిస కాకముందే బంధనాలు తెంచుకో
మనసుపెట్టి వినరా మధుసూదనా!
#111
పురుగు గొంగళి నుంచి పుట్టిన సీతాకోక
చేరదీయ చేసేను చీదరించిన చేతితో
పట్టుదలగ పరిశ్రమ ఫలితమిచ్చు తప్పక
మనసుపెట్టి వినరా మధుసూదనా!
#110
అపార్థం తెచ్చు అనవసరపు మాటలు
పొదుపు మాటలతో ప్రశాంతత దొరుకు
ప్రశాంత చిత్తమున పనులు సఫలమగు
మనసుపెట్టి వినరా మధుసూదనా!
#109
ప్రయత్నమన్నది లేకుంటే పెరుగుదలెక్కడిది
గింజలెప్పుడు మొలకెత్తవు గాదెల్లోనే ఉంటే
మన్ను చేరి నీరందగ మొలకెత్తును నాటుకొని
మనసుపెట్టి వినరా మధుసూదనా!
#108
అల్పులేయని అధికార అహం చూపిన
చలిఎండకు చెలించని చీమల దండులా
కరినాగు కోరలు ఊడబెరుకు కలిసిగట్టుగా
మనసు పెట్టి వినరా మధుసూదన!
#107
కావాలి అడిగినది కాదంటే కుదరదంతే
మార్పు వచ్చె స్వరంలో మారుతున్న తరంలో
కన్నవారిపై ప్రేమ కరుగుతున్న మంచు కొండే
మనసు పెట్టి వినరా మధుసూదన!
#106
వినయంతో ఉండు విజయలక్ష్మి వరించగ
వాపును చూసి బలుపను భ్రమలోనుండకు
తలకెక్కిన విజయం తిప్పలు తప్పక తెచ్చును
మనసు పెట్టి వినరా మధుసూదన!
#105
వినే సందర్భం వీక్షించే సమయం
వాస్తవికతను చూపొచ్చు వేరే విధంగా
గుడ్డిగా నమ్మక గట్టిగా సమిక్షించు
మనసు పెట్టి వినరా మధుసూదన!
#104
కలకాలం ఉండవు కమ్మిన మబ్బులు
కరిగిపోవు చినుకులై కలిగిన కష్టాలు
బ్రతుకు సుఖమగు బాధల మబ్బు వీడి
మనసు పెట్టి వినరా మధుసూదన!
#103
భారమగు మనసు బాధలు చుట్టుముట్ట
భవిష్యత్తుపై ఆశ బలముగా ఉన్నప్పుడు
నేడు బాధలెన్నున్నా నిన్నేమి చేయలేవు
మనసు పెట్టి వినరా మధుసూదన!
#102
ఇల్లంటే నాలుగు గడపలు కలిపే ఇటుక గోడనా
వసతి లేని ఇల్లు విశాలమున్నా ఉపయోగమేమి
దేహానికే కాని దాహానికి పనికిరాని కడలి నీరల్లే
మనసు పెట్టి వినరా మధుసూదన!
#101
నిజమెప్పుడూ నిష్ఠూరంగానే ఉండు
చెప్పే రీతిలో చెప్పిన ఫలితముండు
చేదు మందుకు చక్కెర తీపి కలిపినట్టు
మనసు పెట్టి వినరా మధుసూదన!
#100
అద్దంలో చూసే అందం అశాశ్వతము
కాలంతో కరిగిపోవు కనిపించే అందం
మనిషిలోని అందం మది చూడగలదు
మనసు పెట్టి వినరా మధుసూదన!
#99
మార్గదర్శకుడు మాధవుడు తోడుండ
నూరు దాయాదుల నేలకూర్చె ఐదుగురు
దార్శనికుడి ప్రోత్సాహాన ధరిత్రి గెలవచ్చు
మనసు పెట్టి వినరా మధుసూదన!
#98
పాలలో దాగిన నెయ్యి పట్టవచ్చు
పెరుగుగా మార్చి వెన్న మరిగించిన
మనఃశుద్ధితో మహాత్ముడు కావొచ్చు
మనసు పెట్టి వినరా మధుసూదన!
#97
నిప్పుతో కలిసిన ఉప్పులా కాకుండ
పాలు చక్కెరలా పతిపత్నులుండ
కమ్మగా కాపురం కొనసాగుచుండు
మనసు పెట్టి వినరా మధుసూదన!
#96
మలినపు ఆలోచనతో మంచి ఫలితమా
చింత గింజ నాటినా చామంతులు వచ్చునా
తలపు మంచిదైన తలవంపులుండునా
మనసు పెట్టి వినరా మధుసూదన!
#95
పన్నుల రూపంలో పీక్కుతినే పాలకులకు
పట్టణాభివృద్ధి మాత్రం పట్టదు ఏకొంచెం
కానరాదే మన గోస కళ్ళు లేనీ కభోదులకు
మనసు పెట్టి వినరా మధుసూదన!
#94
మన నగరాలు మహా నరక కూపాలు
కాలుష్య కంపు దారంతా గతుకులు
తెరిచిన నాళాలు యమపురికి ద్వారాలు
మనసు పెట్టి వినరా మధుసూదన!
#93
కాపురాన కలహం కూరలో కరివేపాకు
కొంచెంగా ఉంటే కలిగించునదో రుచి
మొదటికే మోసం మోతాదు మించితే
మనసు పెట్టి వినరా మధుసూదన!
#92
కాసులాశ చూపి కోరికలు కోరినంతనే
దుడ్డుపై ఆపేక్షతో దైవమనుగ్రహించునా
అల్పబుద్ధి తోటి ఆలోచనలు ఏలా
మనసు పెట్టి వినరా మధుసూదన!
#91
ముత్యపు అక్షరాల మధుర పదాలు
భావ వ్యక్తీకరణకు బాగుగా వాక్యాలు
తరిగిపోని ఊట తేట తెనుగు భాష
మనసు పెట్టి వినరా మధుసూదన!
#90
భావమెంత క్లిష్టమైన బాగుగా పలికించు
పలుకు మాటతోటి పులకింత కలిగించు
తెలుగు భాషలోన తీపిదనం కనిపించు
మనసు పెట్టి వినరా మధుసూదన!
#89
అర్ధించిన ద్రౌపతిని ఆపదలో ఆదుకున్న
అచ్యుతా వినలేవా అబలల ఆక్రందనలు
మధించ రావా మదమెక్కిన మృగాలను
మనసు పెట్టి వినరా మధుసూదన!
#88
లాభమేమి కలుగు లక్ష దీపాలెలిగించ
దీపమొక్కటి చాలు దైవమనుగ్రహించ
జ్ఞాన జ్యోతి వెలిగి అజ్ఞానమంతరించ
మనసు పెట్టి వినరా మధుసూదన!
#87
వేషధారణయందు వేరులేకున్ననూ
పలుకు మాట బట్టి పసిగట్ట వచ్చును
స్వాములలో దొంగ స్వాములు వేరయా
మనసు పెట్టి వినరా మధుసూదన!
#86
నేతి బీరకాయలో నెయ్యి ఎంతుండునో
నేటి రాజకీయాలలో నీతి అంతుండెను
విలువలు లేకపోతే విలువెక్కడుండును
మనసు పెట్టి వినరా మధుసూదన!
#85
నిగ్గదీసి అడుగు నీతి లేని నేతలని
బాధ్యతనెరుగక పదవులెందుకని
పదవులకోసం ప్రాకులాటెందుకని
మనసు పెట్టి వినరా మధుసూదన!
#84
దాన గుణం లేని ధనవంతుడి కన్న
పెద్ద మనసున్న పేదవాడు మిన్న
ఉల్లి చేసే మేలు ఊడల మర్రి చేసేనా
మనసు పెట్టి వినరా మధుసూదన!
#83
సోదరి సోదరుల స్నేహానుబంధాల
తరగని విలువ తెలుపు రక్షాబంధనాలు
మంచి విలువల కూర్పు మన సంస్కృతి
మనసు పెట్టి వినరా మధుసూదన!
#82
కడలిలో నీరు కొదవలేకున్ననుగానీ
కుత్తిక తడుపు కొంచెమైన కొలను నీరు
దాన బుద్ధి లేక ధనమెంత ఉంటేమి
మనసు పెట్టి వినరా మధుసూదన!
#81
అవకాశాలున్నచోట అవరోధాలుండొచ్చు
అవరోధాలధికమిస్తే అందలాలెక్కొచ్చు
అలసత్వం వీడి అడుగేయి ముందుకు
మనసు పెట్టి వినరా మధుసూదన!
#80
బరిలో దిగాక బలవంతుడిగా పోరాడు
బంటు చదరంగంలో బలహీనుడైనా
మడమ తిప్పక ముందడుగు వేయును
మనసు పెట్టి వినరా మధుసూదన!
#79
దోస్తాన బాగుంటే దొరబాబులే అందరు
దోచుకుని దాచుకునే దొంగబాబులందరు
బెడిసిన దోస్తానాతో బాగోతం బయటపడు
మనసు పెట్టి వినరా మధుసూదన!
#78
దశాబ్దాల స్వపాలనలో దారిద్ర్యమెందుకుండె
వారు పోయి వీరొచ్చిన వాసి మారకుండె
అభివృద్ది ఫలాలు అందరికీ అందకుండె
మనసు పెట్టి వినరా మధుసూదన!
#77
నడిరాత్రిన ఒంటరిగా నడిచివెళ్తే ఆడవారు
నిజమైన స్వాతంత్ర్యమనే నాడు గాంధీజీ
పట్టపగలు నడవలేని పరిస్థితుండె నేడు
మనసు పెట్టి వినరా మధుసూదన!
#76
నడి రోడ్డున మృగాళ్ళ నేత్తుటి ఆటలేలా
అబలల వేదన అరణ్య రోదనేనా
మదమనంచక మీనమేషాల మతలబేలా
మనసు పెట్టి వినరా మధుసూదన!
#75
రాజ్యాలు లేకున్నా రాచరికపు పోకడలు
వేళ్ళు నాటుకున్న వారసత్వ జాఢ్యంతో
గణతంత్ర దేశాన గణతంత్రమెక్కడుండు
మనసు పెట్టి వినరా మధుసూదన!
#74
అడిగిన వానికి అన్నమన్నది పెట్టక
అడగని దైవానికి ఆరగింపు సేవలేల
నరుడిలో చూడొచ్చు నారాయణుడిని
మనసు పెట్టి వినరా మధుసూదన!
#73
ఆగని హత్యాచారాలు అవినీతి అరాచకాలు
భరతమాత కీర్తికి భంగం కలిగించుచుండగ
అమరవీరుల ఆత్మలెంత ఆవేదన చెందునో
మనసు పెట్టి వినరా మధుసూదన!
#72
రమ్మని కబురంపాల రవిచంద్రులకు
తమ పనిని తాము తప్పక చేయునే
బుద్దిగా పనిచేయక బద్దకము నీకేల
మనసు పెట్టి వినరా మధుసూదన!
#71
కఠిన ఇనుమునైనా కరిగించవచ్చు
బండ రాయినైనా పిండి చేయవచ్చు
మూర్ఖ మానవుడి మది మార్చలేము
మనసు పెట్టి వినరా మధుసూదన!
#70
ముళ్ళ దారులెన్నివున్నా మొక్కవోని దీక్ష తోటి
అలుపులేని అలలవోలే ఆగకుండా సాగిపోయే
ప్రయత్నానికి ఫలితముండు విజయలక్ష్మి వరించుచుండు
మనసు పెట్టి వినరా మధుసూదన!
#69
విపరీత బుద్దుల వికృత చేష్టలు
మానవాళికే మాయని మచ్చను తెచ్చే
సాటివారి బాగు కోరని సాంకేతికతేల
మనసు పెట్టి వినరా మధుసూదన!
#68
చినుకులన్నీ చేరగా చెరువంతా నిండులే
కరములన్నీ కలపగా కొండంతా పిండగులే
ఒకరికొకరు తోడవగా ఒఱకములు పోవులే
మనసు పెట్టి వినరా మధుసూదన!
#67
కన్నవారిని బాధించు కరుణలేని పిల్లలకి
కన్నపిల్లలు చూపులే కన్నవారి బాధని
ఆసాంతం తిరిగిచ్చు అసలుకు వడ్డీ కలిపి
మనసు పెట్టి వినరా మధుసూదన!
#66
అంతరించకున్న ఆర్ధిక అసమానతలు
అందమైన దారులు ఆకాశహర్మ్యాలు
కాజాలవు అభివృద్దికి కొలమానాలు
మనసు పెట్టి వినరా మధుసూదన!
#65
ఆపేక్షతన శిష్యుల అక్కున చేర్చుకొని
అజ్ఞాన తిమిరాలు అంతమొందించు
గురు భాస్కరులు గౌరవనీయులు
మనసు పెట్టి వినరా మధుసూదన!
#64
ద్రోణుడు లేక ధనుంజయుడు లేడు
గురువు కనిపెట్టి గురి చూపెట్టకున్న
మట్టిలోనే మగ్గిపోవు మాణిక్యాలెన్నో
మనసు పెట్టి వినరా మధుసూదన!
#63
మనుషులంతా ఒక్కటే మతమేదైనా
ఎర్రని రక్తమేవుండు ఏ కులపోడికైనా
మానవత్వం మిన్న మతకులాల కన్నా
మనసు పెట్టి వినరా మధుసూదన!
#62
కరిగిపోవు కష్టాలు కన్నీరు కారుస్తుంటె
మేడెక్కలేవు మెట్లు చూస్తూ కూర్చుంటె
ఫలితమెక్కడుండు ప్రయత్నించకుంటె
మనసు పెట్టి వినరా మధుసూదన!
#61
సప్తపది కాపురం సప్తస్వర సంగీతం
సరిగా కూర్చిన స్వరాగాలు ఎన్నెన్నో
కూర్పు తెలియక కుంటి సాకులేల
మనసు పెట్టి వినరా మధుసూదన!
#60
జిహ్వచాపల్యానికి జేజేలు కొడుతూ
క్రమశిక్షణమాని కడుపునింపుచుండ
చెత్తకుప్పగ మారి చేసేను కీడెంతో
మనసు పెట్టి వినరా మధుసూదన!
#59
మన మనిషి మనను వీడినపుడు
మది బరువెక్కు మునుపటి తలపులతో
మరుపే ఔషధం మది బరువుదించ
మనసు పెట్టి వినరా మధుసూదన!
#58
పక్కవాడి స్థితిని పరిహసించకెపుడు
ఎట్లుండునో భవిష్యత్ ఎవరికెరుక
చెరువులోని రాయి చేరొచ్చు గర్భగుడి
మనసు పెట్టి వినరా మధుసూదన!
#57
అతి మంచితనం అన్నివేళల అనర్ధం
మంచిదని ఔషధం మరింత గ్రోలిన
గరళముగ మారి గందరగోళం చేయు
మనసు పెట్టి వినరా మధుసూదన!
#56
భయపడకు నీవెపుడు బాధలెన్నివున్న
కటువు బాధలన్నవి కలకాలముండవు
కృష్ణపక్షము దాటి శుక్లపక్షముండు
మనసు పెట్టి వినరా మధుసూదన!
#55
నీ జీవన పయనంలో నీవు కలిసేదెందరినో
గడువులు వేరైనా గమ్యమందరిదీ ఒక్కటే
అనుభూతుల గుర్తులే ఆఖరికి మిగిలేవి
మనసు పెట్టి వినరా మధుసూదన!
#54
బ్రతకాలన్న ఆశ బలముగానున్నపుడు
బాధలెంతున్న భారమనిపించదెపుడు
బ్రతుకు తీపినెరిగిన బ్రతుకు ఆశ పెరుగు
మనసు పెట్టి వినరా మధుసూదన!
#53
ఒంటరిగా వస్తాము ఒంటరిగా పోతాము
ఉందాము కలివిడిగ ఉన్నంతవరకు
పోయేది ఏముంది పోరు నష్టం తప్ప
మనసు పెట్టి వినరా మధుసూదన!
#52
కోట్లాదిపతికైన కడు పేదవాడివోలె
కాడు చేరినపుడు కాసులెంటరావు
కోట్ల కాసులకన్న కాస్త పుణ్యముమిన్న
మనసు పెట్టి వినరా మధుసూదన!
#51
వైకుంఠపాళంటి వ్యక్తి జీవితములో
ఉథ్థాన పతనాల ఊగులాటలెన్నున్న
పరమపదము చేరు ప్రయత్నాలుండాలి
మనసు పెట్టి వినరా మధుసూదన!
#50
మహిని గెలిచినా మరువకు నీ మూలాలు
మూలాలు మరిచిన మనిషి మనుగడ
ఆధారము తెగి ఆగమైన గాలిపటమోలె
మనసు పెట్టి వినరా మధుసూదన!
#49
గూటిలోని గాలిపటం గాలిలో ఎగురుచుండ
గొప్పతనం మొత్తంగా గాలిపటానికెట్ల కలుగు
ఓపికన దారాన్ని ఒడుపుగ కదిపేవాడుండగ
మనసు పెట్టి వినరా మధుసూదన!
#48
కాసుల చింతేల కాటికెళ్ళు వరకు
కానరావు కాసులు కాడు చేరినపుడు
కలిగుండు నలుగురిని కలకాలం తలవంగ
మనసు పెట్టి వినరా మధుసూదన!
#47
పట్టెడన్నముతో పొట్ట నిండునపుడు
కక్కుర్తి పడనేల కాసుల సంపాదనలో
కోటీశ్వరులేమి కాసులన్నం తినరుగా
మనసు పెట్టి వినరా మధుసూదన!
#46
పంచభూతాల సాక్షిగా పెనవేసిన బంధాలు
గాలివాటంగా సాగే నీటి బుడగలాయే
నింగి చేరక నేల రాలే చిన్నచిన్న చిచ్చులకే
మనసు పెట్టి వినరా మధుసూదన!
#45
మనసులు కలవని మొహమాట కాపురం
కలవని పట్టాల కలిసి పయనమోలె
దూరమెంత వెళ్ళినా దెగ్గరెప్పుడు కావు
మనసు పెట్టి వినరా మధుసూదన!
#44
ఒరిగేది ఏముంది ఓర్వలేనితనముతో
జరిగేది ఎప్పుడు జరగకుండ ఆగదు
పద్దతి మార్చుకుంటే ఫలితం వేరుండు
మనసు పెట్టి వినరా మధుసూదన!
#43
మన్నంటక పెరిగిన మేలైన విత్తనం
మన్ను చేరకున్న మొలకెత్తకుండు
కలిమి విలువెక్కడ కష్టమెరుగనపుడు
మనసు పెట్టి వినరా మధుసూదన!
#42
మరణించి మనిషి మన్ను చేరుతుండె
మన్ను చేరి విత్తనం మొలకెత్తుతుండె
ఆశలుడిగిన చోటున అవకాశాలుండె
మనసు పెట్టి వినరా మధుసూదన!
#41
కాలానికి ఉండదు కనికరం ఏమాత్రం
ఆరు నూరైనా ఆగదు క్షణమైనా
కరిగిన కాలంపై కలుగు చింతలేల
మనసు పెట్టి వినరా మధుసూదన!
#40
ప్రోత్సాహకాలేల పుట్టిన కులము బట్టి
అసమానతల అంతరాలు అంతరించ
అవకాశాలుండాలి ఆర్థిక స్థితిగతుల బట్టి
మనసు పెట్టి వినరా మధుసూదన!
#39
పండ్లున్న చెట్టుకే పడును రాళ్ళ దెబ్బలు
కరిగిపోవు మనసుకే కలుగు తల నొప్పులు
ముండ్లెన్ని ఉన్నా మంచి దారి వీడబోకు
మనసు పెట్టి వినరా మధుసూదన!
#38
మొగ్గలోనే త్రుంచు మనస్పర్థల భూతాన్ని
పగులు చిన్నదని పట్టించుకోకున్నా
తెగును ఆనకట్ట తీవ్రతెక్కువవగా
మనసు పెట్టి వినరా మధుసూదన!
#37
అయినవారి మీద ఆధారపడునేల
సొంత కాళ్ళ మీద సాధించి చూపెట్టు
వృక్షమొదలని విత్తు వృక్షమెప్పుడవదు
మనసు పెట్టి వినరా మధుసూదన!
#36
ఏడడుగుల బంధంతో ఏకమైన ఇద్దరు
తాళిమి మరిచి తప్పటడుగులు వేస్తుంటే
అగ్నిసాక్షి బంధం అగ్గిపాలు అయిపోదా
మనసు పెట్టి వినరా మధుసూదన!
#35
పండ్లిచ్చిన చెట్టుకు పండునివ్వబోముగా
పాలిచ్చిన ఆవుకు పాలు పోయబోముగా
చేకూరిన సాయానికి చేతనైన సాయమివ్వు
మనసు పెట్టి వినరా మధుసూదన!
#34
ఫలితంపై ధ్యాసేల పనిపై గురిపెట్టు
ఆయాస పడబోకు ఆలోచించి అతిగా
కలిగేది ఎప్పుడు కలగకుండ ఉండదు
మనసు పెట్టి వినరా మధుసూదన!
#33
కుర్రి సుష్కించగ కబేళానికి చేరులే
ముసలి తల్లి మజిలి వృద్ధాశ్రమమాయే
పాలిచ్చి పోషించగ ప్రతిఫలము ఇదేనా
మనసు పెట్టి వినరా మధుసూదన!
#32
కటువైన కాకర కలిగించు మేలు
తియ్యటి చక్కెర తెప్పించు రోగాలు
మాట రుచినెరిగి మసలుకో ఎల్లపుడు
మనసు పెట్టి వినరా మధుసూదన!
#31
అవసరానికి మించి ఆస్తి సంపాదనేల
కోట్లాస్తి కూడపెట్ట కలుగు చింతలేల
ఆనంద జీవనానికి ఆస్తితో పనియేల
మనసు పెట్టి వినరా మధుసూదన!
#30
ఎక్కడ పుడతారో ఎవ్వరైనా ఎరుగుదురా
పరమార్థం దాగుండు ప్రతి పుట్టుక వెనుక
జీవితార్థం గ్రహించి జీవించు ఉన్నతంగా
మనసు పెట్టి వినరా మధుసూదన!
#29
నా కులమే గొప్పంటూ నానాయాగీ చేస్తావు
ఏ కులములో పుడతావో ఎరుకనా నీకసలు
పుట్టిన కులము కన్నా పెరిగిన గుణము మిన్న
మనసు పెట్టి వినరా మధుసూదన!
#28
కొండంత ఆశయం కొంచెమైపోయెగా
కొల్లాయి తాత కార్యదీక్ష ముందర
కండ బలం కన్నా కార్యదక్షత మిన్న
మనసు పెట్టి వినరా మధుసూదన!
#27
ఒక్క చేతి వేళ్ళే ఒక్కతీరుగ లేనపుడు
పక్కవాడితోటి పోల్చుకునేదెందుకు
సారమును బట్టి సాగు దిగుబడి ఉండు
మనసు పెట్టి వినరా మధుసూదన!
#26
ఆశించకు దేనిని అప్పనంగ అవతల నుంచి
ప్రతిగా ఆశించు వారు ప్రతిఫలము నీనుంచి
భారమైన అంచనాలతో భంగపాటు పడనేల
మనసు పెట్టి వినరా మధుసూదన!
#25
నమ్మిన సిద్ధాంతాన నడిపించు జీవితాన్ని
పద్దతి మార్చకుండు పరుల మెప్పుకోసమని
చిక్కులెన్ని ఎదురైనా చింతించకు కడవరకు
మనసు పెట్టి వినరా మధుసూదన!
#24
ఎదుటివారి మెప్పుకోసం ఏ పని చేయమాకు
విచక్షణతో ఆలోచించి వేసేయి ముందడుగు
తలదించకు ఎప్పుడు తప్పుకానంత వరకు
మనసు పెట్టి వినరా మధుసూదన!
#23
ఒట్టి చేతులతో వచ్చి ఒంటరిగా పోతావు
నీవు లేని ప్రపంచాన నీ జ్ఞాపకాలే మిగులు
కాలగర్భంలో కలిసి కనుమరుగగు బ్రతుకేలా
మనసు పెట్టి వినరా మధుసూదన!
#22
చూడవేప్పుడు కనులు చెవులు విన్నదంతా
కనులు చూసినదంతా కాదులే నిజాలు
పనికిమాలిన మాటలు పెడచెవిన పెట్టు
మనసు పెట్టి వినరా మధుసూదన!
#21
గురి తప్పనీయకు గెలిచేంతవరకు
ఆపకు ప్రయత్నాన్ని అలుపెంతున్నా
అలుపుతో సూరీడు ఆగిపోతుండునా
మనసు పెట్టి వినరా మధుసూదన!
#20
ఉలి దెబ్బలకు ఉసూరుమనకా
పట్టుదలగా పరిశ్రమ చేయగ
శిల లాంటి నీవు శిల్పం కావా
మనసు పెట్టి వినరా మధుసూదన!
#19
కాలి నడక జీవితాన కోరినంత సమయముండే
వేగవంత జీవితాన వెసులుబాటు లేకపోయే
అలుపెరగక పరుగెడుతూ అర్ధంలేని జీవితమాయే
మనసు పెట్టి వినరా మధుసూదన!
#18
గలగల మాట్లాడ గొప్పేమీ కాదు
గులక రాళ్ళు కూడా గలగలలు చేసేను
మాట విలువ నెరిగి మసలుకో ఎల్లప్పుడు
మనసు పెట్టి వినరా మధుసూదన!
#17
అదుపు లేని నోరు అడ్డగోలుగ వాగు
నోరు జారిన మాట నిరతముగ వెంటాడు
మాట పలుకు బట్టి మనిషి విలువ ఉండు
మనసు పెట్టి వినరా మధుసూదన!
#16
సరైన వైద్యమివ్వని సర్కారు దవాఖానలు
కాసుల కకుర్తిన కార్పోరేట్ ఆసుపత్రులు
బడుగుజీవి ప్రాణానికి భరోసా లేకపోయే
మనసు పెట్టి వినరా మధుసూదన!
#15
అన్నివేళల సరికాదు అతి మంచితనము
స్వచ్చమైన బంగారం సులువుగ వంచబడు
రాగి మలినము తోటి రాటు తేలును చూడు
మనసు పెట్టి వినరా మధుసూదన!
#14
అవసరాన జనులు అతివినయం చూపు
కానరాదు వినయం కడుపు నిండినపుడు
మసకబారును బుద్ది మరిచిన సాయమున
మనసు పెట్టి వినరా మధుసూదన!
#13
బకెట్ నీళ్ళతో బోలెడు అంట్లు కడిగె నాడు
కుళాయి నీటికి కొంచెమైనా పొదుపేది నేడు
తీరు మారకుంటే తిప్పలొచ్చును చూడు
మనసు పెట్టి వినరా మధుసూదన!
#12
పుట్టిన కులము పెంచదు నీ గౌరవము
గౌరవమెక్కడుండు గుణము పెరగకున్న
పూత పూసిన కంచు పుత్తడెప్పుడు కాదు
మనసు పెట్టి వినరా మధుసూదన!
#11
జాత్యహంకార జాఢ్యం జన శ్రేయస్సు కోరునా
మతఛాందస మౌఢ్యం మనిషిని మనిషిగ చూసునా
నాగరిక సమాజములో అనాగరిక ఆలోచనలా
మనసు పెట్టి వినరా మధుసూదన!
#10
మార్పు కోరుతుంది మొరుగు పడగ సమాజం
మనమెందుకు కాకూడదు మంచి పని చేయ
ముందుండి నడిపించగ మార్పు తీసుకరాగ
మనసు పెట్టి వినరా మధుసూదన!
#9
మనమంటే సమాజం మనవెంటే సమాజం
మచ్చలేని సమాజం మచ్చుకైన ఉండునా
మురికి కాలుకంట కాలు నరకబోముగా
మనసు పెట్టి వినరా మధుసూదన!
#8
కఠిన సమయమున కావాలి సంయమనం
భయాన్ని తొలగించి భరోసాని కలిగిద్దాం
విజ్ఞతతో ఎదురొడ్డి విజయ జెండా ఎగురేద్దాం
మనసు పెట్టి వినరా మధుసూదన!
#7
ఓటి కుండలో నీళ్ళెక్కడుండు
ఒట్టి మాటలలో విలువెక్కడుండు
విలువలేని మాట మాట్లాడకుండు
మనసు పెట్టి వినరా మధుసూదన!
#6
కొడుకుమీది ప్రేమ కూతురిపై లేదేల
ఆడపిల్ల అంటే ఈడపిల్ల కాదా
అప్పగింతలతోటే ఆగిపోవునా బంధం
మనసు పెట్టి వినరా మధుసూదన!
#5
ఆవేశమున మాటలు అనర్థాలు తెచ్చు
తమాయించుకున్న తలనొప్పులుండవు
ఆలోచనతో మాట్లాడు ఆవేశమునగాక
మనసు పెట్టి వినరా మధుసూదన!
#4
భక్తి లేని పూజ భగవంతుని చేరనేల
విలువలు లేని విద్య ఉపయోగమేల
శ్రద్ధ లేని పనులు సాధించునదేమి
మనసు పెట్టి వినరా మధుసూదన!
#3
కూడబెట్టిన సొమ్ము కాష్టంలో తోడురాదు
లోక కళ్యాణార్ధం లోభితనము వీడు
పేరు కోసం సాయం ఫలితమివ్వదెన్నడు
మనసు పెట్టి వినరా మధుసూదన!
#2
అవసరాల స్నేహం అద్దమల్లె ఉండు
పగిలిన అద్దంతో ప్రమాదముండు
ప్రమాదాలు తెచ్చే పరిచయాలు ఏల
మనసు పెట్టి వినరా మధుసూదన!
#1
కలహాల కాపురాన కలిమెక్కడుండు
దుష్ట స్నేహమందు నష్ట మెక్కువుండు
అనాలోచిత పనులతో అపార్ధాలుమెండు
మనసుపెట్టి వినరా మధుసూదన!
కామెంట్లు
కామెంట్ను పోస్ట్ చేయండి