నా చిట్టి తల్లి
నా చిట్టి తల్లి నా చిట్టి తల్లి నీ రాక తోటి నా లోకం మారెనులే నాకెంతో అందంగా కనపడెనులే ! నా చేతుల్లో తొలి సారి నిను తీసుకున్నపుడు నను నేను మరిచానులే నిను చూస్తూ మురిసానులే ! ॥ నా॥ నీ చిన్ని పాదాలు నా ఎదను తన్నంగ గిలిగింత కలిగెనులే నా తనువంతా పులకించెనులే ! నీ నోట తొలి మాట నా చెవిని తాకంగ సరిగమలు వినిపించెనులే నా మదిని అలరించెనులే ! ॥ నా॥ నువ్వేసిన తొలి అడుగు నువు దిద్దిన తొలి అక్షరం నేనెప్పుడూ మరవనులే నాకు కలకాలం గుర్తుండునులే ! నీ ఉండ నా చెంత నా చింత మాయం ఏ మాయ చేశావోలే మొత్తంగా ఏ మంత్రమేశావోలే ! ॥ నా॥ నా లోకమంతా నీవే ఉండగా ఘడియలు క్షణమాయెనులే గమ్మత్తుగా కాలమే కరిగిపోయెనులే ! నీ ప్రతి పుట్టిన రోజు నా మట్టుకు నీ తొలి పుట్టిన రోజేలే … నా కంటికి నీవెప్పుడూ పసి పాపవే ! ॥ నా॥